Битола ја живее филмската магија - Свечено отворен фестивалот Камера 300

Синоќа свечено беше отворено 34-то издание на интернационалниот фестивалот на аматерскиот документарен филм „Камера 300“. Пред присутните во име на организаторот поздравно обраќање имаше Стефан Хаџи Андоновски, а гостите ги поздрави и го прогласи за отворен фестивалот градоначалникот на Битола Тони Коњановски.

„Во оваа прилика сакам да ви честитам за Вашиот придонес кон негувањето и чувањето на делото на браќата Манаки, првите сниматели на Балканот.

Интернационалниот фестивал на аматерскиот документарен филм „Камера 300“ кој годинава по 34-па се одржува претставува силно културно обележје не само на градот, туку и пошироко на државно ниво и во светски рамки.

Уникатноста на овој фестивал е пренесувањето на големото платно на обичните приказни, реалните настани, погледот на секојдневието, раскажани од луѓето зад камерата, приказни кои го доближуваат секојдневието до гледачите, односно публиката“ рече градоначалникот Коњановски.

Гран при наградата „Плакета Милтон Манаки“ за најдобар филм на фестивалот му беше врачена на авторот Марјан Стевановски за филмот „Мојот син“.

Беа доделени и наградите златна, сребрена и бронзена камера 300, како и плакети за најдобра камера, режија, монтажа, идеја, репортажа и сребрен медал на УНИКА.

Исто така беа доделени и специјални награди-плакети за трајни вредности, за креативен пристап и за промотивен пристап во жанрот.