Од утре започнува исплатата на готовина за граѓаните без платежни картички во „АЛТА банка“ Битола

Народната банка соопшти дека од четврток, 5 ноември 2026 година, започнува исплатата на готовински средства за граѓаните кои имаат платежни сметки во „АЛТА банка“ АД Битола, но не поседуваат платежни картички. Исплатата ќе се врши на шалтерите во главната филијала на банката во Битола, при што граѓаните ќе можат да подигнат најмногу 20.000 денари во период од две недели.

За исплатата ќе бидат отворени повеќе шалтери во главната филијала на банката, на улицата „Добривое Радосављевиќ“ бр. 21 во Битола.

Исплатата ќе се врши во текот на повеќе денови според распоред, за кој граѓаните ќе бидат известени преку СМС-порака, со наведување на денот и часот кога треба да дојдат во филијалата“, соопштија од Народна банка.

Клиентите ќе добијат СМС-порака со денот и часот кога треба да дојдат. Од Народната банка апелираат да се почитуваат термините и да не се доаѓа порано или во денови кога лицето не е повикано, за да се избегнат гужви и долго чекање.

За граѓаните што нема да можат да пристигнат во определениот термин ќе бидат обезбедени дополнителни термини. Од 6 ноември, вклучително и во сабота, 7 ноември, филијалата ќе работи во две смени.

Шалтерите ќе служат исклучиво за подигање готовина, без извршување други трансакции.