Премиерно изведена театарската претстава за деца „Во светот на Зоки Поки“ во Битола

Премиерата на театарската претстава за деца „Во светот на Зоки Поки“ чија драматизација ја направи битолскиот писател Никола В. Ристевски, а во изведба на учениците од Едукативен Центар Едусфера ги стопли срцата на публиката и ги измами детските насмевки.

Оваа претстава ги слави другарството и добрината, љубовта, поддршката и искреноста. Оние важни лекции кои провејуваат низ романот, а низ времето не ја изгубиле својата вредност. Тоа се лекции кои јас како наставник сакам учениците да ги знаат исто како формалните лекции кои ги учат на училиште.

Искрената и посветена работа на овие ученици направи публиката да дише заедно со нив, а громогласниот аплауз на премиерата кој траеше беше доказ дека создадовме едно радосно и шаренолико ремек дело кое блеска од талент и искрени емоции. Благодарни сме на Општина Битола за поддршката на овие млади таленти. Битола има активни младинци со кои може да се гордее, изјави Ана Жежовска-Кузманоска, која како координатор се погрижи секој детал од оваа детска манифестација да им донесе незаборавно доживување на посетителите.

Дополнително беше организирана изведба и за второодделенците од основните училишта Тодор Ангелевски и Даме Груев.