Иницијатива на ЛДП Битола за воведување бесплатен јавен превоз за студентите на битолскиот универзитет

Советничката група на ЛДП во Битола поднесе иницијатива до Советот на Општина Битола за воведување бесплатен јавен превоз за сите студенти кои студираат на Универзитетот „Св. Климент Охридски“ – Битола.

Иницијативата, поднесена од советникот Димитар Кузмановски, има за цел да обезбеди еднакви права и услови за сите академици во државата, посочувајќи го примерот со студентите од Скопје кои веќе ја користат оваа привилегија.

„Тоа што важи за скопскиот универзитет, мора и треба да важи и за битолскиот универзитет. Има доволно средства – потребна е само политичка волја и желба оваа иницијатива конечно да стане реалност“, истакнуваат од ЛДП Битола.

Со оваа предлог-мерка се очекува значително да се олесни студентскиот стандард, намалувајќи ги секојдневните трошоци за живот и патување на младите во Битола, како и да се поттикне поголема користење на јавниот превоз во градот.