Во Битола пристигнаа африканска мачка Сервал, американски ракун, берберска овца, був и свет ибис - донација од белградската золошка

Благодарение на успешната соработка и пријателство со Зоолошката градина Белград битолското зоо-семејство од денес е побогато за неколку нови, фасцинантни животински видови, соопшти Зоолошката градина во Битола.

Во нивниот нов дом во Битола пристигнаа:

Сервал – величествената африканска мачка со преубав изглед

Був – мудриот и мистериозен господар на ноќта

Свет ибис – егзотична и прекрасна птица со богата историја

Берберска овча – уникатен жител на карпестите предели

Американски ракун – нашиот нов симпатичен и разигран сограѓанин

Сите нови жители успешно го поминаа патот, се сместени во нивните нови живеалишта и се под будното око на нашиот ветеринарен тим. Меѓуинституционалната соработка и размена се клучни за унапредување на условите, збогатување на нашиот фонд и едукација на посетителите. Му се заблагодаруваме на тимот од Зоо Белград за прекрасната соработка. Ве покануваме сите овој викенд да не посетите, да прошетате низ Зоо Битола и лично да им посакате топло добредојде на нашите нови жители.-порачаа од битолската золошка градина.