Видео: Лимит на плаќањата од Алта банка од 10.000 денари неделно за граѓаните

Гувернерот на Народната банка, Трајко Славески на вонредна прес конференција соопшти дека извршниот одбор на Народна банка на седница донесе решение со кое се воведува администрација во Алта банка а.д. Битола.

Се посочува дека ваквото решение ќе биде од времен карактер.

Гувернерот појасни дека воведувањето на администрацијата привремено преминува во надлежност на лица на Народната банка.

Исто така рече дека во наредните денови ќе има одредени ограничувања за плаќањата. Во текот на една седмица, лимитот на плаќања е 10.000 денари за граѓаните.

„Во интерес на граѓаните, а со цел извршување на секојдневните плаќања, определен е неделен лимит за одлив од сметките на физичките лица во износ од 10.000 денари, којшто може да се користи со картичките издадени од банката“, изјави Славески.

Се појаснува дека нема ограничувања за интерните плаќања меѓу сметките на клиентите во рамките на Алта банка, и за физички и за правни лица.