Нуркачи чистеа пластика и стаклени шишиња од дното на Охридско езеро

Во рамките на активностите за заштита на езерскиот екосистем, членовите на Нуркачкиот центар „Амфора“ успешно реализираа акција за чистење на дното на Охридското Езеро.

Акцијата се спроведе на потегот од кампот Градиште до локалитетот Велидаб, при што нуркачите извлекоа цврст отпад од езерското дно, пред сè пластика, стаклени шишиња и други фрлени предмети кои го загадуваа езерското дно.

Овој значаен еколошки проект е финансиски поддржан од Секторот за туризам и локален економски развој при Општина Охрид, со цел подобрување на состојбата со животна средина и подигнување на јавната свест за зачувување на природните и туристичките убавини на регионот.

Ваквите активности се од клучна важност за зачувување на биолошката разновидност во езерото и апелираат до сите посетители и граѓани на одговорно однесување кон природата.

Фотографии: Нуркачки центар Амфора