Рѓосани, но убиствени како да се нови - вели Стојанче Ангелов за бомбите во Битола на 200 метри воздушна линија од куќите

Рѓосани, но убиствени како да се нови - вели директорот на Дирекцијата за заштита и спасување, Стојанче Ангелов за бомбите во Битола пронајдени и отстранети на 200 метри воздушна линија од куќите.

„За три дена тим од 4 пиротехничари на ДЗС, од битолско Тумбе Кафе, на растојание од околу 200 метри воздушна линија од куќите, откопаа и отстранија вкупно 1.811 бомби и тромлонски мини. Рѓосани но убиствени како да се нови.“-вели тој.

Како што вчера соопшти Ево, во акцијата на Тумбе кафе беа пронајдени преку 4000 бомби од Првата Светска војна.

„Се отстранува голема опасност за куќите кои се наоѓаат на 200 метри воздушна линија од местото со бомби. Ископувањата продолжуваат понатаму, а се очекува да се пронајдат уште повеќе од 1.000 вакви бомби, но и други видови на неексплодирани убојни средства. Во акцијата освен пиротехничарот од Битола поради недостиг на стручни кадри во ДЗС му помагаат и тројца пензионирани припадници од МВР, “ вели Ангелов. Тој исто така упати и апел до граѓаните. „Доколку забележите предмет што наликува на бомба, граната или друг проектил, пријавете на 112. Не допирајте и не поместувајте го предметот, бидејќи може да биде смртоносно опасен“, изјави Ангелов во Битола.