Инстаграм влегува во битка со Јутјуб: Пристигнуваат хоризонтални видеа до 90 минути

По години целосна доминација на вертикалните кратки форми и клипови, Инстаграм официјално прави историски пресврт во својата стратегија. Платформата започна со тестирање на сосема нов формат наречен „Features“, со кој им овозможува на креаторите објавување хоризонтални видеосодржини со времетраење до дури 90 минути.

Овој потег претставува директно навлегување на територијата на Јутјуб и стриминг-платформите, насочувајќи се кон еден нов сегмент на публиката — подкастери, комичари, автори на едукативни емисии и продуценти на подолги интервјуа кои досега своите целосни епизоди ги објавуваа исклучиво на други платформи.

Стратешко свртување кон долгите форми

Новата функционалност беше официјално најавена од врвот на компанијата, меѓу кои и првиот човек на Инстаграм, Адам Мосери, и потпретседателката за производи, Теса Лајонс. Иако Мета во минатото неуспешно се обиде да се наметне во оваа област со независната апликација IGTV, аналитичарите оценуваат дека сегашните околности се целосно изменети. Навиките на публиката се свртени кон секојдневно следење на долги разговори и емисии, особено во домашни услови преку паметни телевизори.

Според новата концепција, кратките вертикални видеа (Reels) остануваат главна почетна точка за привлекување нови гледачи, додека новите хоризонтални видеа им овозможуваат на корисниците подлабоко навлегување во темите. Креаторите ќе имаат можност да поврзат до неколку пократки исечоци директно со главната долга епизода, задржувајќи ја публиката целосно во рамките на екосистемот на апликацијата.

Фокус кон големите екрани и телевизорите

Проширувањето на видеостратегијата на Мета не е ограничено само на паметните телефони. Паралелно со тестирањето на подолгите формати, Инстаграм брзо ја шири својата присутност на пазарни сегменти резервирани за традиционалните медиуми.

По лансирањето апликации за различни паметни телевизори претходната година, платформата неодамна официјално стана достапна и преку посебна апликација за Apple TV, носејќи ги кратките видеа, преносите во живо и новите подолги содржини директно во дневните соби.

Предизвици и отворени прашања

Иако техничката инфраструктура и навиките на корисниците се создадени за овој чекор, експертите посочуваат дека клучниот предизвик за одрржливоста на формата „Features“ ќе биде монетизацијата. За разлика од Јутјуб, кој има развиено систем за директна делба на приходите од реклами со авторите, Инстаграм сè уште нема воспоставено целосен систем за финансиски поттик на долгите видеа. Поради тоа, креаторите во оваа фаза сè уште се потпираат на сопствени спонзорства и бренд-интеграции.

Првичниот тест на новата можност во моментов е достапен за ограничен број избрани корисници во САД, додека официјалните датуми за глобално проширување кон европскиот пазар сè уште не се прецизирани. Доколку експериментот се покаже како успешен, границата меѓу класичните социјални мрежи и видеоплатформите во иднина ќе стане целосно невидлива.

Фотографија: Unsplash