Андријана Арлен со концертот „Silver Night“ доајѓа во Битола - Музичко-визуелен спектакл во Центарот за култура

„Сребрена ноќ“ e ексклузивна турнеја на Андријана Арлен, каде класичната, филмската и современата музика се спојуваат во 90-минутен аудиовизуелен спектакл.

Битолската публика на 12 ноември 2026 година ќе има можност да биде дел од ексклузивно музичко-сценско искуство. Во Големата сала на НУ Центар за култура – Битола, со почеток во 20:00 часот, ќе се одржи премиум концертната вечер „Silver Night“ на познатата шведска пијанистка и композиторка Андријана Арлен.

Концертот е дел од нејзината светска турнеја „Live Tour 2026“ и претставува 90-минутно аудиовизуелно патување во кое класичното пијано се спојува со современ звук, уметничко осветлување и кинематографски визуелни ефекти.

Богата сцена и истакнати гости

На сцената во Битола, покрај Андријана Арлен на пијано, ќе настапат и голем број домашни изведувачи и гости кои ќе придонесат за збогатување на овој перформанс:

Битолскиот камерен оркестар (DIVA)

Балетското студио „Анабела“

Љупчо (Saxman)

Дарко Тодоровски (вокал)

DJ Zorbital

Турнејата е во организација и продукција на Инфера Студио. Со спојот на класичниот инструмент, камерниот оркестар, балетските движења, саксофонот и модерните електронски ритми концертот ветува единствена атмосфера.

Андријана Арлен е шведска уметница препознатлива на светската „classical crossover“ сцена. Својата посветеност кон музиката ја започнува на 12 години, изучувајќи ги делата на мајсторите како Бах, Бетовен и Шопен. По магистрирањето на престижната Музичка академија во Шведска, настапува како солистка во Шведска, Данска, Италија, Србија и Бугарија.

Во 2021 година е добитничка на две значајни музички награди, а зад себе ги има и популарните изданија Chasing Dreams, Soul of Tears, Christmas Piano Stories и Meet Me on Christmas.