ВЕЧЕР СО ПОЕЗИЈАТА И ДУХОВНОСТА: Битолчанката Вера М. Самарјанин ги промовираше своите нови изданија во Кавадарци

Во организација на Здружението „Тиквешки цветови“ и со благослов на Митрополитот Повардарски г. Агатангел, во Кавадарци се одржа свечена промоција на најновите дела на истакнатата авторка Вера М. Самарјанин.

Настанот, кој се одржа на 1 септември, започна во храмот „Свети Димитрија“, а потоа продолжи со дружење во ресторанот „Монако“. Со ова беше за заокружена една вечер исполнита со духовност, поезија и музика — три нишки кои според присутните се испреплетоа во незаборавна целина, вели авторката.

Поводот за оваа културна манифестација беше јубилеен: промоцијата на 149-тата и 150-тата авторска книга на Вера М. Самарјанин, како и презентацијата на нејзината нова детска сликовница со наслов „Ива и Џуле“, наменета за најмладата публика.

Авторката Самарјанин ја истакна својата длабока благодарност за бесплатната поддршка и беспрекорната организација. „Почекав да се соберат впечатоците од сите присутни. Останав без зборови тогаш, понесена од радосната возбуда, а тешко ги наоѓам вистинските зборови и сега со кои би ја изразила мојата благодарност. Оваа промоција ќе остане запаметена како еден од оние мигови што продолжуваат да живеат во сеќавањето“, изјави таа.

Посебна благодарност од страна на авторката и публиката беше упатена до Митрополитот г. Агатангел, членовите на Здружението „Тиквешки цветови“ и нивната претседателка, г-ѓа Марија Црвенковски, кои со својата посветеност и гостопримство овозможија настанот да помине во топла и достоинствена атмосфера.

Според впечатоците на бројните гости и љубители на пишаниот збор, Кавадарци беше домаќин на редок културен настан кој остави силен белег во духовниот и литературниот живот на градот.