Турските гости се меѓу најчестите посетители на Македонија, Битола има посебно место на нивната туристичка агенда

Во првите седум месеци од 2026 година, државата ја посетиле вкупно 741.446 туристи, при што било забележано зголемување на бројот на странските туристи.

Меѓу најбројните странски гости биле туристите од Турција, Германија, Србија, Романија и Албанија.

– Овие резултати ја нагласуваат важноста на континуираната промоција на Македонија, унапредувањето на квалитетот на туристичките услуги и развојот на автентична, одржлива и конкурентна туристичка понуда, во согласност со потребите на современите туристи. Вештачката интелигенција и дигитализацијата отвораат нови можности за поефикасно управување со туристичките дестинации, подобро планирање и создавање поиндивидуализирани, поинклузивни и поквалитетни туристички искуства. Во соработка со приватниот сектор и сите чинители во туризмот, продолжуваме посветено да создаваме услови за развој на современ и конкурентен туристички сектор, кој ќе ги следи светските трендови, ќе ги зачувува нашите вредности и ќе отвора нови можности за граѓаните и економијата – нагласуваат од Министерството за култура и туризам.

Османското наследство и Ататурк: Зошто Битола е омилена дестинација за турските туристи

Битола се наоѓа на врвот на листата најпосетени градови во регионот од страна на туристите од Турција. Врските меѓу градот под Пелистер и Турција се длабоки, историски и емотивни — од времето кога Битола, под името Манастир, била важен воен, дипломатски и трговски центар во Османлиската Империја.

Постојат неколку клучни причини зошто овој град има посебна привлечност за турските посетители:

Спомен-собата на Мустафа Кемал Ататурк: Таткото на модерна Турција, Мустафа Кемал Ататурк, се образувал во Битолската воена гимназија (денешниот Завод и музеј – Битола) во периодот од 1896 до 1899 година. Спомен-собата посветена на неговиот лик и дело денес е вистинско место за аџилак за турските туристи, кои доаѓаат да го видат местото каде што се челела неговата визија.

Легендата за Елени Каринте: Нераскинлив дел од приказната за Ататурк е и легендарната љубовна приказна со битолчанката Елени Каринте. Нивната неизживеана романса и познатото писмо дополнително вдахнуваат романтика што привлекува љубопитни посетители.

Богатото османлиско архитектонско наследство: Покрај музејот, Битола изоболува со зачувани споменици од исламската архитектура. Старата чаршија, Јени џамијата, Исак џамијата и Безистенот нудат препознатлива архитектура и дух кој на гостите од Турција им нуди чувство на блискост.

„Градот на конзулите“ и Широк Сокак: Архитектурата од крајот на 19-тиот и почетокот на 20-тиот век на познатиот Широк Сокак го претставува европското лице на некогашниот османлиски Манастир. Поради дипломатското значење и конзулатите кои функционирале во тоа време, Битола задржала софистициран европско-ориентален шарм.

За многумина од нив, посетата на Битола не е само обична туристичка турнеја, туку патување низ сопствената историја и култура, обвиено со познатата македонска гостопримливост и гастрономија.