Музички спектакл во античкиот театар: Борче Наумовски – Министерот со незаборавен концертен јубилеј во Хераклеа

Битолската публиката сведочеше на музички настастан за кој долго ќе се зборува, откако познатиот фолк-пејач Борче Наумовски, во музичките кругови познат како „Министер за естрада“, одржа спектакуларен јубилеен концерт во преполниот антички театар Хераклеа Линкестис.

Пред верната публика која со нетрпение го очекуваше овој настап, Наумовски уште еднаш докажа зошто со децении важи за еден од омилените изведувачи на домашната фолк-сцена. Давајќи го максимумот на сцената, тој ја држеше публиката на нозе во текот на целата вечер, редејќи ги своите препознатливи хитови кои создадоа енергична и емотивна атмосфера.

Концертот имаше и силна емотивна нота. Посебно значаен момент беше кога Наумовски испеа серенада во чест на неговиот прв учител, легендарниот битолски музичар Боцкино. На сцената му се придружија и бројни колеги од естрадата, со што ја потврдија меѓусебната поддршка и пријателство, додека за врвниот музички амбиент се погрижи големиот во живо оркестар предводен од проф. Кирил Стојчевски, негов долгогодишен соработник и автор на голем дел од неговите песни.

Величенствената вечер беше заокружена со емотивна завршница во која ечеа македонски песни и битолски серенади, предводени од култната „Ако одам во Битола“. Спектакуларниот настап беше крунисан со грандиозен огномет кој го осветли небото над античкиот локалитет, оставајќи печат на една незаборавна музичка ноќ во Битола.