Смелиот проект „Industrial Symphony“ на Оркестар „DIVA“ вечерва ексклузивно во Битола

Битолската публика вечерва ќе има прилика да посведочи на уникатно музичко доживување. Во рамките на роденденската прослава „Д Бест оф Битола“, која одбележува 13 години постоење под мотото „Битола за Битола“, Оркестар „DIVA“ пред локалната јавност ќе го изведе еден од своите најхрабри и најавангардни проекти – „Industrial Symphony“.

Оваа автентична музичка приказна, која премиерно и со голем успех беше изведена почетокот на оваа година во Скопје, за првпат доаѓа пред битолската публика, ветувајќи звук кој излегува од вообичаените рамки.

Зад изведбата на овој специфичен симфониски проект стојат добро познати уметнички имиња кои ќе ги здружат силите на сцената: Огнен Димовски, Јасна Димитровска и Жарко Јакимоски.

Покрај иновативниот концепт на „Industrial Symphony“, вечерната програма ќе биде збогатена и со заеднички настапи на Оркестар „DIVA“ со неколку добро познати и етаблирани битолски музички групи.

„Денес Битола ќе слушне нешто поинакво. Ова е спој на енергија и традиција, посветен на градот кој секогаш знаел да препознае квалитетна уметност“, порачуваат организаторите по повод 13-годишниот јубилеј на манифестацијата.

Концертот се очекува да привлече голем број љубители на квалитетниот звук, славејќи ја локалната креативност и битолската урбана култура.