Невремето проследено со поројни дождови го одложи концертот на оркестарот DIVA во Битола за 8 јули

Концертот на отворено на познатиот оркестар „DIVA“ (Orchestra DIVA), кој требаше да се одржи овој петок во Битола, се одложува за следната недела поради најавите за лоши временски услови. Како што информираат од организацијата, новиот термин за музичкиот настан е 8 јули, а локацијата и времето остануваат исти.

Од оркестарот „DIVA“ појаснуваат дека одлуката е донесена со цел да се осигура безбедноста на сите присутни, со оглед на тоа што метеоролошките прогнози предвидуваат пообилни врнежи од дожд и електрични празнења.

„Во изминатите два дена внимателно ја следиме временската прогноза. Иако лани на Flowers Symphonу нè изненадија неколку капки дожд, сепак за овој петок најавите се за понестабилно време, а безбедноста на публиката, музичарите и целата екипа ни е на најважно место. Поради тоа, одлучивме концертот да го одложиме за следната недела. Исто место, исто време, само различен датум“, се вели во соопштението на организаторите.

Информации за влезниците и рефундација

Организаторите испратија и важни насоки до сите граѓани кои веќе обезбедиле билети за настанот:

Важност на билетите: Сите веќе купени влезници ќе важат и за новиот термин на 8 јули.

Повраток на средства (Рефундација): Граѓаните кои нема да бидат во можност да присуствуваат на концертот во новиот термин, можат да извршат рефундација на средствата на самото место каде што е купена влезницата (Тобако „Димпо“).

Онлајн билети: Оние кои ги купиле своите билети по електронски пат, за рефундација можат да се обратат на е-маил адресата: info@yournextevent.info.

Од оркестарот упатија благодарност до публиката за разбирањето и трпението, со порака заеднички да го наполнат Пациото на НУ Завод и Музеј – Битола во новиот јулиски термин. .