Зад секој мој успех стои и името на мојата Македонија: Дивна Пешиќ Грозданов со прво место на American Art Awards 2026

Македонската уметница и олимпијка, Дивна Пешиќ Грозданов, освои прво место на меѓународниот натпревар American Art Awards 2026.

Таа се закити со првото место во категоријата Апстрактен експресионизам со своето дело „Воздигнувањето на интелигенцијата“ (The Ascendancy of Intelligence). Ова е нејзина трета победа на светски натпревари во 2026 година во рамки на нејзината 34-годишна ликовна кариера.

Пешиќ Грозданов го упати овој успех и како посебна честитка за државниот празник 23 Октомври – Денот на македонската револуционерна борба.

„Да победиш еднаш е достигнување. Да победуваш последователно е наследство. Иако ова не е моето прво светско прво место во мојата 34-годишна ликовна кариера, чувството на радост, исполнетост и гордост е секогаш непроценливо! Особено кога знам дека зад секој мој успех стои и името на мојата Македонија! Бидејќи сум двократна олимпијка тоа ме научи како да се натпреварувам со најдобрите. Тоа што сум уметник ме научи како да создадам нешто што никој друг не може. Јас не ги следам уметничките граници. Јас создавам свои. Тоа е DIVNISM“, истакна Пешиќ Грозданов.

Таа во својата објава порача и дека „најдоброто допрва доаѓа“, упатувајќи празнична порака до македонскиот народ: „Среќен празник, Македонци! Нека ни е вечна и горда Македонија!“.