Мешовитиот хор „Стив Наумов“ од Битола настапи во Македонскиот КИЦ во Софија

Со изведба на богата програма составена од духовна хорска музика, композиции инспирирани од македонскиот фолклор и современи хорски дела, Мешовитиот хор при КУД „Стив Наумов“ од Битола синоќа оствари историски прв настап во Македонскиот културно-информативен центар (КИЦ) во Софија.

Концертот, кој се одржа во рамките на 21-та година од постоењето на КИЦ, го отвори директорот на Центарот Зоран Пејковски. Тој во своето обраќање ја истакна симболиката на хорското пеење како спој на различни гласови во единствена хармонија и подвлече дека културата создава мостови што ги зближуваат луѓето.

„Овој настан беше прекрасна средба на македонската музичка традиција и бугарската културна средина, но пред сè, беше средба на луѓе обединети преку јазикот на музиката. Ваквите вечери се најубавиот потсетник дека културата не познава граници, туку отвора врати“, истакна Пејковски.

За уметничкиот резултат и посветеноста беа упатени посебни признанија до диригентката Лилјана Трајковска-Димевски, која раководи со хорот, како и до претседателот на КУД „Стив Наумов“, Владимир Христовски.

Настапот на битолскиот хор е дел од културната програма на Македонскиот КИЦ во Софија, каде што покрај хорската музика како израз на музичкото наследство, денеска фокусот е насочен кон македонскиот јазик и неговата афирмација во европски рамки по повод Европскиот ден на јазиците.