Илинденски денови го раздвижија Новаци - Tанци и звуци од цел свет сред Пелагониското поле

Со звуците на традиционалниот мелос, раскош и шаренило од народни носии и незаборавна атмосфера, и жителите на Општина Новаци уживаа во годинешното издание на манифестацијата „Илинденски денови“ кој имаше гостувачка вечер во оваа рурална општина. Настанот, кој веќе традиционално ги обединува љубителите на фолклорот и културното наследство, понуди богата програма која ги поврза македонската традиција и светските култури.

Прославата започна со импресивно Илинденско дефиле низ улиците на Новаци. Учесниците, облечени во автентични и колоритни носии, прошетаа низ општинскиот центар пренесувајќи ја пораката за важноста на чувањето на корените и идентитетот. Дефилето беше само увертира за централниот настан – свечениот концерт кој се одржа во дворот на Општина Новаци, каде бројната публика уживаше во врвни фолклорни изведби.

Годинава, сцената во Новаци блесна во меѓународен сјај. Пред присутните со свои извонредни кореографии настапија КУД „Везилка“ од Новаци, како домаќини кои уште еднаш покажаа како достоинствено се негува локалниот и националниот мелос, „Flying Georgians“ од Тбилиси, Грузија, кои ја фасцинираа публиката со својата енергија и карактеристичен традиционален танц, „Venezuela Danza y Tambor“ од Корал Спрингс, Флорида, САД, кои донесоа егзотични ритми и специфичен фолклорен колорит.

Преку моќта на музиката и играта, овие три ансамбли испратија силна заедничка порака за пријателство, меѓусебна почит и културна поврзаност меѓу народите.

Градоначалникот на Општина Новаци, Стевче Стевановски, упати срдечна благодарност до сите учесници, но и до клучните партнери кои помогнаа во реализацијата на овој значаен настан.

„Особена и голема благодарност упатуваме до ЈУ Центар за култура – Битола и директорот Сашо Илковски за одличната, професионална соработка во организацијата на оваа незаборавна вечер. Заедно и посветено ја чуваме, ја негуваме и ја пренесуваме македонската традиција и богатото културно наследство на идните генерации,“ истакнуваат од Општина Новаци.