ЉУБОЈНО ПУЛСИРА ВО ЗНАКОТ НА ТРАДИЦИЈАТА: Над пет децении Илинденски средби што ги спојуваат иселениците со родниот крај

Преспанското село Љубојно викендов е центарот на македонската традиција и заедништво. Синоќа, со масовна посетеност и празнична атмосфера, започнаа 53. по ред традиционални Љубански Илинденски иселенички средби, манифестација која повеќе од пет децении претставува силен мост меѓу родниот крај и македонските иселеници ширум светот.

Саботната програма започна на познатата љубанска полјана, каде стотици мештани, гости и иселеници од прекуокеанските земји се собраа на заедничка дружба. Почетокот на вечерта помина во знакот на македонската песна со групата „Молика“ и Тина.

Негување на врските со родниот крај

Присутните уживаа во раскошниот настап на ансамблот за фолклор „Гоце Делчев“ од Битола, кој со своите игри и кореографии измами огромни аплаузи. Прекрасната летна вечер во Преспа продолжи со голема народна веселба до доцните часови, каде покрај група „Молика“ и Тина, свој настап имаше и Даниела Темелкова.

Програмата продолжува и денес на Илинден

Празнувањето во Љубојно продолжува со полн ек и денес, на самиот ден Илинден. Утринските часови започнаа со црковно богослужение во познатиот манастир „Св. Илија“, каде верниците запалија свеќи за здравје и благосостојба. Во духот на празникот и почитта кон историјата, предвидени се и традиционалните илинденски активности, меѓу кои и положување свежо цвеќе пред споменикот на паднатите борци.

Љубанските средби не запираат тука. Попладневната и вечерната програма и денес ветуваат одлична забава на полјаната во Љубојно, каде за празничното расположение ќе се погрижат фолк-ѕвездите Татјана Лазаревска, Благица Вељаноска Колева и повторно групата „Молика“.

Организаторите уште еднаш упатуваат отворена покана до сите љубители на македонскиот мелос, фолклор и традиција – денешниот празничен ден да го поминат во Преспа и да бидат дел од оваа историска манифестација.

Текст и фотографии: Тони Степановски