Хиперреалистичните скулптури на македонскиот уметник Жарко Башески претставени во Музејот на современа уметност во Белград

Македонскиот уметник Жарко Башески вечерва ја отвори изложбата „Корпореалност“ во Музејот на современа уметност во Белград. Изложбата се организира по потпишаниот Меморандум за соработка помеѓу Музејот на современа уметност во Белград и Националната галерија на Македонија.

„Самостојното претставување на проф. Жарко Башески токму во галерискиот простор во Музејот на современа уметност е навистина уметнички подвиг и го покажува интересот за неговиот хиперреалистичен пристап во оформувањето на делата, кои ни зборуваат за човекот и за светот во кој што живееме. Преку своите реални претстави на постоењето, уметникот Башески нè воведува во често предизвикувачки елементи од реалноста, кои понекогаш и не можеме толку лесно да ги забележиме со обичен поглед кон прикажаното. Во неговите високоценети скулптури се испреплетуваат повеќе концепти, со современ поглед на човековата состојба преку самонабљудување, со употреба на нови материјали и со филозофски пристап при моделирањето и изработката. Сите тие елементи нудат повеќеслојно читање на уметничкото дело“, вели кустостот Маја Крстевска.

Башески е истакнат вајар, професор и дописен член на Македонската академија на науките и уметностите, кој во 2011 ја претставуваше Македонија на Венециското биенале за уметност.

На овој значаен културен настан во Белград присуствуваше и градоначалникот на Прилеп, Дејан Проданоски, кој истакна дека за него и за градот е огромна чест и гордост што уметничкото дело на нивниот сограѓанин добива свое заслужно место во еден од најважните музејски центри.

Проданоски потенцираше дека академик Башески преку својот вонреден талент, знаење и посветеност го афирмира Прилеп надвор од границите на државата. Во присуство на бројни академици, професори, научници, стопанственици и јавни личности, градоначалникот упати искрени честитки до уметникот, подвлекувајќи дека Прилеп уште еднаш потврди оти е град на големи луѓе и големи дела.

Изложбата ќе биде отворена за посетителите до 9 ноември 2026 година.