КОГА ЦВЕТОВИТЕ ЗБОРУВААТ: „Етеричен хербариум“ на Лидија Стефановска ја освои Битола

Битолската ортодонтка д-р Лидија Стефановска се претстави со 130 уметнички дела

Пространата галерија „Ранко Струмениковски“ во Битола се покажа претесна да ги прими сите љубители на уметноста кои дојдоа да посведочат на едно несекојдневно ликовно деби. Познатата битолска специјалистка по ортодонција, д-р Лидија Стефановска, официјално чекори во уметничкиот свет со својата прва самостојна изложба симболично насловена „Етеричен хербариум“, претставувајќи импресивна колекција од дури 130 платна во различни формати.

Зад оваа масовна уметничка експлозија стои приказна која започнува во деновите на пандемиската изолација. Како пасиониран светски патник кој посетил 55 земји, Стефановска во моментите кога светот застана, почувствувала потреба да отвори ново животно поглавје. Самоука, но водена од силна интуиција, мануелна прецизност наследена од татка си и длабока духовност всадена од нејзината баба, таа преку деноноќна работа успева да изгради сопствен визуелен идентитет каде секоја капка боја носи дел од нејзината душа.

Ликовна критика: Енергија што зборува кога зборовите молчат

Отворајќи ја изложбата пред многубројната публика, галеристoт д-р Драган Ристевски посочи дека во творештвото на Стефановска доминира силен витален импулс.

„Кај нејзините дела, органските и цветни форми пулсираат со динамика и силен контраст на интензивни тонови. Белината на платното е во постојан дијалог со колоритниот центар, создавајќи игра на текстури и симболи. Ова не е обичен реализам, туку декоративна експресија која отвора пат кон современата флорална апстракција“, истакна Ристевски.

На неговите зборови се надоврза и ликовниот критичар Владо Ѓоревски, кој направи осврт на историскиот и духовен однос на човештвото кон цвеќето, критикувајќи го денешното потрошувачко општество кое го претворило цветот во обичен комерцијален дизајн.

„Лидија Стефановска со исклучителен ентузијазам и лична искреност му се враќа на цветот како на магиски и лековит симбол. Таа применува специфична технологија – нанесува чисти бои директно на платното, постигнувајќи стаклен, интензивен сјај и транспарентност без класично нијансирање. Етеричен хербариум е всушност нејзин личен ликовен дневник“, образложи Ѓоревски.

Од стоматолошка прецизност до дип-хаус инспирација

Самата авторка, родена во Битола во 1959 година, чиј професионален пат е врзан за Стоматолошкиот факултет во Скопје и успешната кариера како ортодонт, открива дека нејзиниот креативен процес е филтриран низ ноќниот мир.

„Моето време за создавање доаѓа длабоко во ноќта, во придружба на поп, рок, џез, а особено дип-хаус музика. Тогаш се буди моето второ јас. Идеите созреваат со недели, се визуелизираат низ немир, а потоа следува вистинска ерупција на емоции врз платното. Секоја слика е производ на долго набљудување под различни светла и расположенија. Ништо не е случајно“, вели Стефановска.

Изложбата, која претставува редок пример за тоа како научната прецизност и уметничката слобода можат да се спојат во едно, ќе биде отворена за битолската јавност во наредниот период, нудејќи вистинско естетско освежување низ силниот авторски ракопис на уметницата.