Битола во златниот час - 14-то издание на изложбата „Со Љубов од Битола“

Изложбата на фотографии „Со Љубов од Битола“, која веќе 14 години традиционално го уловекува и слави духот на градот, го најавува своето најново издание. Свеченото отворање ќе се одржи во четврток, 13 август, со почеток во 20:00 часот, во фоајето на НУ Центар за култура Битола.

Годинешната тема носи наслов „Битола во златниот час“, инспирирајќи ги локалните и домашните автори да ја уловат специфичната светлина, атмосфера и архитектура на Битола низ нивните објективи. На јавниот конкурс, кој траеше во текот на целиот месец јули, учествуваа 19 автори.

Селекцијата на трудовите ја изврши стручно жири во состав: Александар Јоначиќ, Горан Кузмановски и Диоген Хаџи-Коста Милевски, кои одбраа 28 фотографии што ќе бидат поставени во рамки на изложбата. За време на официјалното отворање, жирито ќе ги соопшти и ќе им додели награди на авторите на трите најдобри фотографии.

Сите љубители на фотографијата и битолската култура ќе можат да ја посетат изложбата во фоајето на Центарот за култура до 28 август 2026 година.