Битолскиот „Џез фактори фестивал“ потпиша Меморандум за соработка со кинеските SPAF и CSIAF 2026

Во преполна сала на конференцискиот центар „Њу Бунд 31“ во Шангај, пред бројни делегации, уметнички директори, претставници на водечки светски фестивали и дипломати, официјално беше потпишан Меморандум за разбирање, соработка и размена помеѓу битолскиот „Џез фактори фестивал“ (JFF) и кинеските партнери на конференцијата на SPAF (Shanghai International Arts Fair) и CSIAF 2026.

Меморандумот го потпиша директорот на „Џез фактори фестивал“, проф. Сашо Поповски, заедно со директорот на Џез фестивалот во Петровац (Црна Гора), Винко Михајловиќ и претставникот на Џез фестивалот во Албанија, Јилјет Аличка.

„Преку потпишување на овој важен документ за разбирање, соработка и размена, отвораме нови можности за меѓународно културно поврзување. По 3 години членство во меѓународната културна мрежа на Патот на свилата, продолжуваме да градиме мостови на пријателство преку културата и уметноста“, истакна Поповски.

Фокус на Националната џез-платформа и академската соработка

Во рамките на презентацијата во Шангај, посебен акцент беше ставен на Националната џез-платформа на Македонија, нејзината улога во развојот и промоцијата на домашната џез-сцена, како и на можностите за унапредување на соработката со кинеските културни институции, фестивали и музичари.

Покрај фестивалската размена, иницирана е и широк обем на академска соработка преку поврзување на Музичката академија при Универзитетот „Гоце Делчев“ – Штип со сродни високообразовни институции во Кина. Со ова се отвораат нови перспективи за размена на студенти и професори, заеднички едукативни и уметнички проекти, работилници, мастер-класови и истражувачки активности во областа на џезот и современата музика.