Џон Блондел по успехот на БНТ во Бјалисток: Фантастичниот Битолски театар донесе незаборавна изведба

Народниот театар Битола забележа нов значаен меѓународен успех со изведбата на Шекспировата трагедија „Кориолан“, која се одржа во преполната сала на театарот во Бјалисток, Полска, како дел од јубилејното 10. издание на меѓународниот театарски фестивал „Direction East“.

Делото, кое е во режија и адаптација на американскиот режисер Џон Блондел, и овојпат го привлече вниманието на меѓународната публика и ги награди актерите со долготрајни и стоечки аплаузи. И самиот режисер Блондел не го криеше своето воодушевување, упатувајќи јавно благодарност до како што сам рече „прекрасниот Битолски театар“ и најавувајќи го претстојното претставување пред домашната публика во Битола на Шекспир фестивалот во ноември.

Ова гостување во Полска, кое следува по значајните настапи на „Охридско лето“, Shakespeare Fringe Festival во Верона и „Magical Nights in Butrint“ во Саранда, ја потврдува улогата на театарот како културен амбасадор кој ја носи креативноста на македонските уметници ширум светот. Современата адаптација на безвременската трагедија отвора исклучително актуелни прашања за власта, политичката одговорност и сложениот однос меѓу поединецот и општеството.

Во претставата настапува врвен актерски ансамбл во состав: Васко Мавровски, Петар Горко, Марјан Георгиевски, Борче Ѓаковски, Петар Спировски, Јулијана Мирчевска и Сандра Грибовска Илиевска. Тимскиот креативен задкулисен состав го сочинуваат асистент на режија Дамјан Димовски, сценографија и костими на Благој Мицевски, дизајн на светло од Џонатан Хикс, светло мајстор Горан Петровски, музика од Александар Димовски, видео изработка од Владимир Переловски, инспициент Оливер Петровски и суфлер Мирјана Христовска.

Со ваквите значајни настапи, Народниот театар Битола продолжува со гордост да го претставува македонскиот театар и успешно да гради мостови меѓу различните култури преку јазикот на уметноста.

Фотографии: Bartek Warzecha, Tеатар Бјалисток, Полска