Започна втората фаза од конзервацијата на надворешните фрески во „Св. Ѓорѓи“ во Курбиново – соработка меѓу Битолскиот музеј и Европскиот центар од Солун

По успешното завршување на конзервацијата на извонредните фрески во внатрешноста на црквата „Св. Ѓорѓи“ во с. Курбиново, официјално започна втората фаза од проектот – конзервација на фреските на надворешните фасади на овој непроценлив споменик на културата.

По тој повод, с. Курбиново го посети г-а Флора Карајани од Европскиот центар за византиски и поствизантиски споменици од Солун, која изрази огромно задоволство од досегашниот тек на активностите и соработката со македонските стручњаци.

„Упатувам искрена благодарност до директорката на НУ „Завод и музеј“ – Битола, Маргарета Спасов, како и до конзерваторите, м-р Оливера Макриевска и м-р Јовица Богоев, за нашата исклучително плодна и креативна соработка, која низ годините прерасна во вистинско пријателство“, изјави Карајани.