Реномираниот италијански Ла Платеа за македонскиот оперски уметник Нацоски: Вистински експерт за современа музика со извонредна харизма и моќен сценски интензитет

Вистински експерт за современа музика со извонредна харизма и моќен сценски интензитет - со овие зборови пишува реномираниот италијански Ла Платеа за македонскиот оперски уметник Благој Нацоски по неговиот последен настап во Италија.

„…Нацоски е исклучително интересен уметник, за кого не престануваме да сметаме дека италијанските театри треба уште повеќе да го ангажираат во главни улоги. Со право може да се нарече вистински експерт за современа музика: десет светски премиери на оперски дела, огромен број досега неизведени арии вклучени во неговите концерти, од кои некои се напишани специјално за него. Улогата е сложена: бара исклучително широк вокален опсег и големи скокови меѓу регистрите. Но, покрај врвната музичка изведба, која Нацоски ја остварува со голема умешност, тој и прави и длабока актерска интерпретација, со внимание кон секој гест и секоја нијанса.

Тенорот Нацоски го постигнува тоа без ниту во еден момент да го жртвува пеењето, со извонредна харизма и моќен сценски интензитет. Всушност, неговиот лик, кој минува низ сопствениот живот и животите на другите, обидувајќи се да ги зачува своите убедувања, но истовремено да не потцени ниту една емоција со која се соочува, станува централна фигура на приказната. Нацоски го оживува со магнетна привлечност и со извонредна способност секоја нота, секоја нијанса и секој гест да ги стави во служба на поезијата на оваа приказна…“, пишува La Platea.

Рецензијата е објавена на следниот линк: https://www.laplatea.it/index.php/teatro/recensioni/6860-la-vita-nuda-allopera-di-roma.html

Нацоски настапи во италијанската престолнина во „Teatro Nazionale“, а неговата најнова светска праизведба на делото „La vita nuda“ силно ја возбуди уметничката јавност.