ПРАЗНИК НА ПОЕЗИЈАТА И МЛАДОСТА: Манифестацијата „Детски гласови 2026“ обедини 92 млади поети во Ресен

Во организација на здружението „Жар Преспа“, во рамките на традиционалната програма „Преспански јаболкобер 2026“, успешно се одржа годинашното издание на манифестацијата „Детски гласови 2026“. Настанот, кој со години го поттикнува детското творештво на македонски јазик, оваа година собра 92 млади автори од сите краишта на Македонија – од Скопје, Охрид, Струмица и Битола, па сè до Македонска Каменица, Кичево, Прилеп, Велес, Крива Паланка и домаќините од Преспа.

Празникот на детскиот стих започна во храмот „Св. Никола“ во селото Јанковец со традиционалната „Цветна штафета на мирот“ на Живко Поповски – Цветин, каде што децата испратија пораки и балони-симболи за мир во светот. Манифестацијата потоа продолжи во спортската сала „Зоран Стојановски“ во Ресен.

Настанот го отвори уредничката и организаторка м-р Даринка Веслиевска, која ја промовираше новата поетска збирка. За квалитетот на пристигнатите творби сведочи и предговорот на м-р Весна Бошковска, која истакна дека „децата се најискрените сведоци на времето, а нивните стихови се вистински бисери излеани од душата“. Лектурата на збирката е на проф. Влатко Стојковски, а настанот го водеа ресенските гимназијалци Марија Ајчевска и Борјан Веслиевски.

Стручното жири во состав Лили Арсова, Зоран Милошевски и Виолета Јосифовска ги прогласи најдобрите меѓу младите таленти:

Наградени автори по категории:

10 години: 1. место – Адријан Шашески (Прилеп), 2. место – Теона Стојаноска (Прилеп);

9 години: 3. место – Јана Доневска (Охрид);

14 години: 1. место – Мила Златков (н. Илинден, Скопје), 2. место – Матеа Јовановска (Велес);

16 години: 3. место – Нина Мафкова (Струмица).

Гран При на жирито за поетски творби:

Лауреати на високите признанија за своите авторски творби беа Саша Зиковска (Кисела Вода – Скопје) и Симона Миланова (Велес), како и младите автори Софија Ѓорѓиоска (Прилеп), Никола Митовски (Крива Паланка), Марија Милановска (Скопје) и Софија Стојанова (Струмица).

Гран При за најубава интерпретација (рецитирање):

За нивните извонредни рецитаторски вештини, со Гран При беа наградени Стефан Стојчески (Прилеп) и Софија Трајкова (Македонска Каменица).

Покрај поетскиот дел, богатата културна програма беше збогатена со настапи на учениците од Школата за пијано (Михаил Туџаровски, Никола Низамовски и вокалот Христина Секуловска), музичко-танцовата точка на Стефанија Веслиевска (ТСК „Спортакус“), како и со книжевни работилници и донации на книги од писателките Вера М. Самарјанин, Виолета Ристевска и Лили Арсова.

Најдобрите учесници освоија пехари, книги и ваучери за викенд во Претор од спонзорот „Милкуз“, додека сите 92 учесници добија дипломи и примерок од новата збирка. Манифестацијата беше реализирана со поддршка од Општина Ресен, голем број локални помагатели и со поддршка од проектот „Култура и креативност за Западен Балкан“ (финансиран од ЕУ и УНЕСКО).