Од срце за уметноста: Тони Наумовски ја доби престижната награда Мето Јовановски

Македонскиот глумец Тони Наумовски е одликуван со високото признание „Мето Јовановски“ за врвни актерски остварувања во филмската уметност, кое се доделува во рамките на петтото издание на Медитеранскиот и балкански филмски фестивал „Преку езерото“ (Across The Lake Film Festival).

Оваа значајна награда го сместува Наумовски меѓу истакнатите имиња на медитеранската и балканската кинематографија.

По повод добивањето на признанието, Наумовски се огласи на социјалните мрежи, изразувајќи ја својата длабока благодарност до организаторите и уметничкиот совет на фестивалот.

„Благословен сум и пресреќен што можам да го споделам ова исклучително признание — наградата Мето Јовановски за врвни актерски остварувања во филмската уметност. Да се биде во низата добитници меѓу легендарните имиња на медитеранското и балканското филмско небо е еден од најзначајните моменти во мојот актерски живот. Ви благодарам од срце, со љубов и благодарност“, истакна Наумовски.

Тој упати посебна благодарност до уметничкиот директор на фестивалот, проф. д-р Јани Бојаџи, како и до Советот на фестивалот предводен од неговата претседателка, м-р Мими Ѓорѓоска-Илиевска, за нивниот труд и посветеност во изградбата на овој фестивал како настан од светски ранг.

Филмскиот фестивал „Преку езерото“ ги обединува најдобрите филмски остварувања од Медитеранот и Балканот, а наградата именувана по бардот на македонското глумиште, Мето Јовановски, претставува едно од најпрестижните признанија што се доделуваат за актерски придонес на овие простори.