Емотивен омаж за поетесата и лекторка Д-р Славица Свидерска на 59. Летна школа на Меѓународниот семинар за македонски јазик

Во Конгресниот центар во Охрид, во рамките на 59. Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ), на 25 август се одржа достоинствен и длабоко емотивен омаж посветен на прерано починатата македонска поетеса и лекторка, д-р Славица Гаџова-Свидерска.

На настанот што го организираа лекторките м-р Елена Ѓорѓиовска и м-р Христина Ангелеска-Мијоска, колегите, семинаристите и домашната и меѓународната македонистичка јавност ѝ оддадоа почит на Свидерска за нејзиниот извонреден поетски опус и за нејзиниот посветен ангажман како лекторка на МСМЈЛК при УКИМ во Тирана.

Настанот го отвори директорката на МСМЈЛК при УКИМ, проф. д-р Кристина Николовска, истакнувајќи ја трајната вредност на нејзиниот збор што продолжува да живее и по нејзиното физичко заминување.

Стиховите на Свидерска одекнаа на 14 светски јазици

Централен дел од вечерта беа поетските читања и препеви што ги подготвија странските македонисти, учесници на летната школа. Стиховите на Славица Свидерска одекнаа на дури 14 јазици: српски, хрватски, романски, каталански, шпански, грчки, турски, унгарски, словачки, бугарски, полски, руски, француски, англиски и украински. Со ова, нејзината поезија започна ново патување во меѓународни рамки, пренесена преку гласовите на новата генерација преведувачи и проучувачи на македонскиот јазик.

По посебно интимен и потресен момент беше обраќањето на нејзиниот сопруг, Михајло Свидерски, кој прочита дел од нејзиното творештво, враќајќи ги стиховите кон нивниот изворен глас.

Музичко-поетска вечер преполна со симболика

Атмосферата беше дополнително збогатена со музички точки во изведба на Алесандро Таљаро и Мануел Торес. Семинаристот и музичар од Аргентина, Мануел Торес, изведе сопствена музичка интерпретација на песната „Патување“, потекната од првата поетска збирка на Свидерска, „Бесконечност“.

Со овој поетско-музички собир, МСМЈЛК при УКИМ уште еднаш ја потврди пораката дека поетите кои ја оставаат својата душа на хартија живеат вечно, а делото на Славица Свидерска продолжува да го поврзува македонскиот збор со светот.