Отворена изложбата на фотографии и дигитални дела „Дома“ на Александра и Илија Ацески во Прилеп

Во ликовната галерија на Центарот за култура „Марко Цепенков“ во Прилеп беше свечено отворена изложбата насловена „Дома – меѓугенерациски дијалози за денот и ноќта“. Станува збор за заеднички уметнички проект на ликовната уметница Александра Ацеска и нејзиниот татко, фотографот Илија Ацески.

Изложбата нуди колаборативен приказ на две различни уметнички перспективи: од една страна, надреалниот свет исполнет со колаж од сонови, спомени и реални места претставен преку ликовниот израз на Александра, а од друга страна, реалистичниот и непосреден фотографски поглед на нејзиниот татко Илија.

Изложбата ја отвори Филип Димкоски, кој посочи дека станува збор за поставка на фотографии и фотоманипулации, кои носат спој на две различни уметнички перцепции. "Илија Ацески е конкретен, прецизен и рационален. Ја застапува аристотеловата теорија дека објектот постои само во онаква форма каква што ја гледа набљудувачот. Спротивно на таа прагматичност, за Александра Ацеска, водата не е само вода, ниту пак планината е само планина. Таа во водата ја бара длабочината, а по планинските височини трага до врвот на мудроста. Овде имаме спротивставеност на машката и женската енергија, на визијата на таткото и визијата на ќерката, на мудроста на искуството и на полетноста на младоста, на цврстината на коренот и на силата на крилјата...Слободата со која се создавани делата, им дава слобода и на посетителите делата индивидуално да ги толкуваат и да извлечат свои пораки, поенти и заклучоци, но упатува на тоа дека домот не е конкретен простор, туку специфична состојба на духот. Добредојдовте дома" - рече Димкоски на отворањето на изложбата на Александра и Илија Ацески.

Настанот предизвика голем интерес кај прилепската културна јавност и љубителите на уметноста, кои ги исполнија просториите на галеријата за да уживаат во ова единствено меѓугенерациско уметничко поврзување.