Битола побогата за уште еден инклузивен уметнички настан: Отворена изложбата „Која е Супердевојката?“ на Вероника Кочов

Во галеријата „Магаза“ во Битола свечено е отворена самостојната изложба на младата уметница Вероника Кочов, насловена „Која е Супердевојката?“. Настанот, кој привлече голем интерес кај граѓаните и љубителите на уметноста, испрати силна порака дека уметноста не познава граници и дека секој поединец заслужува простор за изразување, поврзување и поддршка.

Изложбата е реализирана на иницијатива на организацијата „Порака Нова“, во соработка и поддршка со НУ Завод и Музеј Битола и семејството на авторката, а во рамки на студиската посета од меѓународниот проект „Inclusive Cultural Education“ (Инклузивно културно образование).

Преку своите специфични и емотивни дела, Вероника Кочов на публиката ѝ овозможи уникатен увид во нејзиниот внатрешен творечки свет. Оваа изложба не само што ја истакна нејзината дарба, туку отвори и важен разговор за рамноправната видливост, можностите и целосното учество на лицата со попреченост во културниот живот.

Поддршка за оваа значајна иницијатива даде и градоначалникот на Општина Битола, Тони Коњановски, кој ја посети изложбата и го истакна значењето на градењето заедница каде секој има еднакви можности да твори.

Организаторите истакнаа дека вистинската инклузивна култура не подразбира само физички пристап до настаните, туку создавање услови секој човек да биде активен учесник, творец и уметник. На младата Вероника ѝ посакаа голем успех во иднина и истрајност во остварувањето на нејзините уметнички сонови.