Порталот Ево.мк ве води на првата „Ноќ на музеите“ во Охрид: Културна магија што го оживеа стариот град и ги разбуди сите сетила

Охрид синоќа пулсираше во знакот на богатата историја, уметноста и традицијата. Извонреден интерес кај домашните и странските посетители предизвика првото издание на манифестацијата „Ноќ на музеите“, која понуди поинаков пристап кон културното наследство преку вечерна прошетка низ 12 препознатливи локации во стариот дел на градот.

Програмата, насловена „Охрид – Град музеј“, започна од Долна порта. Оттаму, во групи предводени од туристички водичи, посетителите тргнаа по улицата „Цар Самоил“ за четири часа да проследат богата културна патека испреплетена со изложби, занаетчиски демонстрации, музика и дегустација на вино во врвни винарии кои го привлекуваат светското внимание на Балканот.

Главната цел на овој пилот-проект, инициран од Културолошката иницијатива „5 до 12“ и поддржан од Општина Охрид и НУ Завод и музеј – Охрид, е настанот да прерасне во традиција што ќе го оживува градот и надвор од главната туристичка сезона.

Прошетајте низ локациите што го одбележаа настанот:

Малезан Филигран & Охридски бисер „Филеви“: Занаетчиството зазеде централно место – посетителите одблиску се запознаа со прецизната изработка на познатиот филигран и тајните зад создавањето на уникатниот охридски бисер.

Спомен-куќа на Христо Узунов: Еден од најавтентичните моменти беше презентацијата на животот и делото на револуционерот Христо Узунов, каде што покрај изложените писма и поставки, атмосферата беше надополнета со перформанс во комитски носии.

Куќа на Робевци & Куќа на Уранија (МАНУ): Љубителите на уметноста уживаа во изложбата „Охрид – Свето таинство“ од Зоран Вељаноски – Летра во Робевци, како и во поставката „Уште една средба со светлината“ со дела од Јордан Манасиески.

Лапидариум & Работилница за стара хартија: Во Лапидариумот беа претставени ракотворби и фотографија, додека кај Љупчо Паневски се демонстрираше древниот процес на рачна изработка на хартија.

Ателје „Трон“: Охридската резба, како значаен столб на македонската уметност, беше претставена преку демонстрација во живо и уметничка изложба.

Вила „Пупин“ (Сараиште) & Концепт XI: Овие точки понудија винска дегустација и вистинска градска боемска атмосфера надополнета со изведбите на ВИС „Билјана“ - вистински моменти за уживање на сите сетила.

Црква „Света Софија“: Културната маршрута заврши во величествениот амбиент пред и околу црквата „Света Софија“, со ликовна изложба и елегантна музичка програма во знаците на операта и пијаното.

Ова прво издание покажа дека Охрид има потенцијал и потреба од вакви европски концепти што го чуваат и промовираат културното богатство на поинаков начин, внесувајќи го во спомените на посетителите засегаш и поттикнувајќи ги повторно да се враќаат во Охрид.

Фотографии: Ево.мк