Андријана Јаневска и огномет на Камената бина во Прилеп по повод 85 години од Народното востание

По повод јубилејот 85 години од почетокот на Народното востание на македонскиот народ, Прилеп подготвува празнична програма во која централно место ќе има големиот музички концерт на познатата македонска уметница Андријана Јаневска.

Оваа информација преку социјалните мрежи ја соопшти градоначалникот на Прилеп Дејан Проданоски, упатувајќи отворена покана до сите граѓани на Македонија да бидат дел од одбележувањето во Градот херој.

Настанот ќе се одржи во сабота, на 10 октомври 2026 година, со почеток во 20:15 часот, на Камената бина на плоштадот „Александрија“ во Прилеп.

Покрај музичката програма и изведбата на патриотски репертоар, за присутните ќе биде приреден и спектакуларен празничен огномет над Прилеп.

„85 години историја. 85 години паметење. 85 години гордост. Ги поканувам сите граѓани на Република Македонија – повелете во Прилеп, Градот херој, заедно да ја одбележиме оваа голема празнична вечер исполнета со прекрасна музика и емоции“, порача Проданоски.