Пред 20.000 фанови Здравко Чолиќ приреди неповторлив спектакл во Битола - Само тој и Bruce Springsteen пејат над 40 песни на еден концерт

Во организација на „Авалон Продукција“, најголемата регионална поп ѕвезда Здравко Чолиќ приреди музички спектакл кој дефинитивно ќе се памети како најголемиот настан во поновата историја на градот и поширокиот регион, привлекувајќи неверојатни 20.000 посетители.

Дека Битола знае да биде одличен домаќин на големи настани се потврди и синоќа, кога стадионот „Петар Милошевски“ беше тесен да ги прими сите обожаватели на најголемата регионална поп-ѕвезда, Здравко Чолиќ. Настанот, кој во јавноста веќе се етикетира како најголемиот музички спектакл во историјата на регионот, привлече околу 20.000 посетители од земјава и од соседството.

На сцената, Здравко Чолиќ уште еднаш покажа зошто неговата кариера успешно трае уште од далечната 1967 година. Со препознатливиот шарм, моќниот глас и силна емоција упатена кон публиката, тој ги спои генерациите кои во еден глас ги пееја неговите хитови.

Музичките сладокусци со право забележуваат еден редок феномен, а тоа е дека како што поминуваат годините, Чолиќ не го крати својот репертоар, туку на секој концерт додава по некоја нова песна. Со повеќе од три часа пеење во живо и изведени над 40 композиции, тој се вбројува во самиот светски врв на изведувачи кои можат да го издржат тоа темпо – веднаш покрај легендарниот Брус Спрингстин.

Од организацијата „Авалон Продукција“ не го кријат задоволството од одзивот и порачуваат дека Битола во секој поглед го заслужува најдоброто и дека градот нема да запре овде.

Веќе вечерва, на истото место, сцената ја презема светски познатиот диџеј Steve Aoki. Со неговиот настап, Битола и Македонија на спектакуларен начин и во светски стил ја започнуваат прославата на 35 години од прогласувањето на независноста. Судејќи по синоќешната енергија, пред битолчани и нивните гости е уште една ноќ за паметење.

Текст: Каролина Николоска, Игор Николоски

Фотографии: Авалон продукција