Во рамките на Летната школа на МСМЈЛК промовиран романот „Немам страв“ од Трајче Стамески

Охридскиот Конгресен центар на 31 август беше домаќин на промоцијата на новиот роман „Немам страв“ од проф. д-р Трајче Стамески, настан организиран како дел од програмата на 59. Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“.

За книжевните квалитети на делото говореше промоторката проф. д-р Данијела Костадиновиќ од Универзитетот во Ниш. Во својата анализа, таа се осврна врз жанровската слоевитост и специфичната нарација остварена преку мултифокализација и техниката mise en abyme. Посебен акцент беше ставен врз психолошкиот портрет на главниот лик Тристан, како и врз универзалните мотиви за стравот, љубовта, меморијата и човековата минливост.

Во рамките на излагањето беше истакната и силната интермедијална врска во романот, каде што елементи од музиката, ликовната уметност и архитектурата директно кореспондираат со внатрешните состојби на ликовите.

Книжевниот настан, модериран од м-р Верица Мукоска, беше заокружен и со изложба на уметнички дела чиј автор е самиот професор Стамески.