„Живот“ од талентираната поетеса Стојна Стојанова пред македонската публика - дело полно љубов, инспирирано од семејството

Талентирана поетеса Стојна Стојанова на големо задоволство на публиката неодамна ја промовираше својата стихозбирка насловена „Живот“.

Делото е всушност е интимен дневник во стихови, создаден со желба да се споделат мислите и вредности кои авторката ги носи со себе.

Стихозбирката Стојанова ја посвети на сите кои искрено и длабоко ги сака во себе. Позитивниот одек од приемот на првата книга, биле повод таа да почне да го создава нејзиното второ дело.

„Сакам да ви ги подарам моите песни, кои ја красат, греат мојата душа, кои се мојот живот. Затоа никогаш не сум сама и не сум несреќна. Во нив има толку многу љубов, што се чувствувам среќна и млада. На крилата на љубовта велат секоја жена сјае. Причина да почнам да создавам се моите внуци. Секоја причина треба да започне со љубов. Тука се и моите деца, мојата најголема инспирација. Секој збор е мисла на нив, за нив, до нив, од нив. Тука е мојот сопруг, мојата сигурност, мојот мир, мојата љубов. Моите песни треба да се проживеат па да се напишат“ – рече Стојанова во нејзиното интимно и искрено обраќање на промоцијата.

Низ своето дело таа ги допира најемотивните теми во животот на секој човек, теми кои се дел од срцето и душата.

„Книгата претставува емотивна збирка од лични песни, размисли и пораки за животот, мајчинството, љубовта, семејството и човечките вредности. Авторката на искрен и топол начин се обраќа до блиските преку едноставни зборови изразува длабоки чувства. Секоја песна е посветена на различна тема –верба, надеж, љубов, подароци, тишина, простување. На овој начин нејзините стихови се патувања низ животот, низ радосни и тажни моменти, кои носат среќа и тага“ – кажа промоторката Анета Шијакова, рецензент на книгата.

Книгата е отпечатена во „Ива 2003“ Велес. Стојанова по професија е дипломиран економист. Неа јавноста ја помни и како кошаркарка на КК Борец. Промоцијата се одржа во Ликовниот салон.

Видеото од промоцијата можете да го погледнете на следниот линк: https://www.youtube.com/watch?v=CK1vlW96LU0