Скејтбордингот не е за девојчиња - прв македонски филм селектиран на престижниот Трибека во Њујорк

Во Њујорк, во рамките на престижниот фестивал Tribeca, се одржа премиерата на филмот „Скејтбордингот не е за девојчиња“ во режија на Дина Дума кој е првиот македонски филм селектиран на овој светски реномиран фестивал.

Американската премиера на филмот во рамките на фестивалот основан од Роберт де Ниро, се одвиваше пред преполна сала и со долга сесија на прашања и одговори, но и пофалби и комплименти за режисерката Дина Дума. Богатата дискусија разви емотивна и прекрасна атмосфера, особено околу прашањата кон Дума за тоа како работела со глумците и како ја постигнала таа автентичност.

Женското дуо режија - продуцент: Дина Дума и Лабина Митевска докажа дека македонскиот филм може да биде селектиран на фестивал каде големите филмаџии сонуваат да бидат. Овој фестивал пулсира со Њујоршки дух, урбаност и последни трендови во културата.

„Скејтбордингот не е за девојчиња“ е во продукција на „Сестри и брат Митевски“, продуцентка е Лабина Митевска, а копродуценти се Себастиен Делуа, Данијел Хочевар и Вања Сремац. Сценариото е на Дина Дума, Лидија Мојсовска и Теона Стругар Митевска, директор на фотографија е Фредерик Ноаром, а во главните улоги се Ефќар Абаз, Симонида Селимовиќ, Џефрина Јашари и Ганимет Абдула.

Овој филм е втор долгомeтражен игран филм на Дина Дума после “Сестри”. Филмот е копродукција меѓу Македонија, Белгија, Словенија и Хрватска, а поддржан е од Агенцијата за филм, „Еуримаж“, Creative Europe MEDIA и национални и регионални фондови од земјите копродуценти. Честитки до целиот тим кој стои зад филмот. Посакуваме оваа искрена и силна приказна да продолжи да допира до публиката на бројни фестивали и кино-сцени низ светот.