Уметноста ја оживеа Старата битолска чаршија: Уметнички инсталации за нов дух и совршен амбиент за турско кафе

Уметничките инсталации во Старата Битолска чаршија го заокружија проектот на „Aurora Network“

Младинската организација „Aurora Network“ официјално го прослави успешното завршување на својот креативен проект со завршен настан и изложба одржана на 14 септември во просториите на „Кисса Театет“ (Kissa Teatet).

Процесот, кој започна со идеи, денови поминати во работилници, учење и дружење, резултираше со изработка на уметнички инсталации што беа поставени низ локациите во Старата Битолска чаршија.

Главни актери во проектот беа млади учесници, волонтери, ментори и тимот кој ја водееше и организираше секоја фаза од создавањето.

Проектот остави зад себе нови пријателства, идеја за заедничко делување и уметничка трага во локалната заедница.

Настанот беше реализиран во рамките на проектот „Граѓанско општество и млади за инклузивен и одржлив развој преку циркуларна економија во Северна Македонија“, финансиски поддржан од Европската Унија. Од организацијата порачуваат дека иако ова е крај на проектните активности, креативните идеи и позитивните промени продолжуваат.

Фотографии: Aurora Network