Битола е домаќин на патувачката програма на Меѓународниот фестивал за краток филм од Александрија - уметноста го зближува регионот

Битолската филмска публика вечерва од 18 часот на малата сцена во 3Д Кино Битола има можност да проследи специјално селектирана филмска програма пристигната директно од Грција. Настанот е дел од патувачкиот караван „Приказни од Балканот – на пат“, зад кој стои Меѓународниот фестивал на краток филм – Александрија (IASFF).

На репертоарот се десет внимателно избрани кратки остварувања проследени на 11-то издание на овој фестивал. Со овој избор, организаторите нудат богата палета на авторски видеа, разновидни жанрови и теми кои ги рефлектираат спецификите на балканското поднебје и пошироко.

Фестивалот IASFF, кој успешно се одржува од 2015 година во Грција, прерасна во препознатлива регионална платформа за промоција на нови и сè уште неафирмирани филмски гласови. Фокусот на овогодишното издание е токму на зближувањето на културите од регионот преку уметноста, поттикнувајќи дијалог и отворена соработка помеѓу авторите и публиката.

Главен организатор на фестивалот е филмскиот и културен клуб „Киниматодрасис“ од Александрија. Овој културен центар, освен што го организира филмскиот фестивал, активно поддржува и повеќе други уметнички секции, меѓу кои аматерска театарска група, литературен клуб и оддели за фотографија и филм, со цел да ги адресира современите општествени прашања и да ги поврзе уметниците од различни области.