БИТОЛСКИОТ ВИРТУОЗ ВЛАДИМИР КОСТОВ СО КОНЦЕРТ НА ОХРИДСКО ЛЕТО: Барок во акустичниот амбиент на „Св. Софија“

Еден од најценетите македонски виолинисти и познат битолски музички виртуоз, Владимир Костов, на 11 август со почеток во 21:00 часот ќе одржи концерт на барокна музика во рамките на реномираниот фестивал „Охридско лето“.

Костов, кој важи за симбол на современата македонска виолинска школа, на сцената во катедралната црква „Св. Софија“ во Охрид ќе настапи заедно со истакнатата уметница на чембало, Цветанка Созовска. Музичката публика со соодветно нетрпение го очекува овој настан, кој ветува врвно естетско и акустично доживување во рамките на фестивалската програма.

Владимир Костов е роден во Битола и зад себе има импресивна интернационална кариера. Тој е долгогодишен концерт-мајстор на Македонската филхармонија и уметник чија префинета техника, емоционална длабочина и сценска харизма редовно ја освојуваат публиката. Во својата богата биографија бележи настапи на светски познати сцени како што се Берлинската филхармонија, „Концертхаус“ во Виена, „Линколн центар“ во Њујорк и Универзитетот „Харвард“. Костов е добитник на престижната награда „Георги Божиков“ и основач на фестивалот „Виолин фест“.

Концертот во „Св. Софија“ претставува уште една можност љубителите на класичната уметност да уживаат во автентичното толкување на барокната музика од страна на македонски уметници со светско реноме. Влезниците и деталите за настанот се достапни преку официјалните канали на фестивалот „Охридско лето“.