НУ Завод и музеј – Битола на годишна конференција на НЕМО во Вилниус: Човекот останува најголемата вредност и во АИ ерата

Претставници на НУ Завод и музеј – Битола, предводени од директорката Маргарета Спасов и д-р Ирена Ружин, зедоа активно учество на Годишната конференција на Мрежата на европски музејски организации (НЕМО - Network of European Museum Organisations), која се одржа во престижниот Национален музеј – Палатата на големите војводи на Литванија во Вилниус.

Настанот собра дури 330 музејски професионалци од 41 земја од целиот свет, кои дебатираа за современите предизвици со кои се соочуваат институциите од културата во ерата на брзата дигитализација.

Вештачка интелигенција, сајбер-безбедност и доверба во музеите

Фокусот на годинешната конференција беше ставен врз растечкото присуство на вештачката интелигенција (AI) во секојдневната музејска работа, прашањата поврзани со сајбер-безбедноста, како и зачувувањето на довербата кај публиката во дигиталното време.

Преку практични работилници, интерактивни панели и конкретни примери од музејската практика, водечки европски експерти ги пренесоа своите знаења и искуства за тоа како музеите можат безбедно и ефикасно да ги применат новите технологии.

Во деновите на оваа исклучително инспиративна конференција, со учеството во панели, предавања, интерактивни работилници, беа создадени нови контакти и остварени средби со наши соработници и пријатели од цела Европа, велат од битолскиот музеј.

Иако конференцијата отвори многу важни прашања за идното управување со технологијата во културата, учесниците донесоа заеднички заклучок дека и покрај сите технолошки иновации, човекот и неговото творештво продолжуваат да бидат најголемата вредност и носечки столб на музеите.

Од НУ Завод и музеј – Битола упатија честитки до организаторите од НЕМО за беспрекорниот настан, а упатија и благодарност до Министерството за култура и туризам за поддршката за учество на овој значаен меѓународен форум.