36 години ВМРО ДПМНЕ Битола - свечена академија се одржа во битолскиот музеј

Со свечена академија, синоќа во битолскиот музеј Општинскиот комитет на ВМРО ДПМНЕ Битола одбележа 36 години од своето формирање.

На одбележувањето присуствуваше претседателот на ВМРО ДПМНЕ и претседател на Владата, Христијан Мицкоски, заедно со партиски функционери, членови, ветерани, Унијата на млади сили, Унијата на жени и бројни поддржувачи.

Претседателот на ВМРО ДПМНЕ, Мицкоски, истакна дека силата на партијата отсекогаш произлегувала од нејзиното единство и довербата што ја добива од граѓаните.

„Ако постои една лекција што ја научивме низ сите изминати години, тогаш тоа е дека ВМРО ДПМНЕ е најсилно кога е обединето. Ниту една функција, ниту една позиција и ниту едно лично несогласување не може да биде поважно од довербата што ни ја дава народот. Нашата сила никогаш не била во поединците, туку во заедништвото и чувството дека припаѓаме на нешто поголемо од нас самите“, порача Мицкоски.

Пред присутните беше речено дека Општинскиот комитет ќе остане целосно посветен на новата визија за развој на Битола. „ВМРО ДПМНЕ е посветено на новата визија за Битола и нејзините граѓани. Ќе бидеме постојано присутни меѓу граѓаните и упатувам јавна отворена понуда за соработка со сите. Ќе ги користиме сите современи начини на работа, затоа што денес политиката бара нов и поинаков пристап, брза реакција, непосредност и лидерство“, рече лидерот на ВМРО ДПМНЕ во Битола, Горан Исков. Свеченоста ја упати пораката за единство, продолжување на заедничката работа и нови успеси за ВМРО ДПМНЕ, Битола и Македонија.

На прославата присуствуваа покрај претседателот на ВМРО-ДПМНЕ и премиер Христијан Мицкоски, генералниот секретар Дрган Ковачки, пратениците од Битола – Силвана Ангелевска, Олга Лозановска и Пеце Милевски, Влдиката Петар, претставници на АД ЕСМ, дел од дипломатскиот кор во Македонија и голем број членови и симпатизери на партијата.