Битола добива нови пешачки семафори: Плоштадот Гоце Делчев станува пешачка зона

Нов сообраќаен проект треба значително да ја зголеми безбедноста на пешаците и да донесе нов лик во центарот на градот. На преминот од Широк сокак кон плоштадот „Гоце Делчев“ во тек се активности за поставување на нови пешачки семафори, кои ќе го олеснат движењето на граѓаните во периодот кога оваа сообраќајница е отворена за автомобили.

Ноќни акција за помал сообраќаен метеж

Со цел да не се наруши секојдневното движење на битолчани, екипите на ЈП „Паркинзи“ деновиве интензивно работат по полноќ. Во ноќните часови се врши бележење на коловозот, согласно основниот сообраќаен проект.

Овој проект предвидува воведување на светлосни знаци за управување со сообраќајот на две клучни крстосници на улица „Широк Сокак“:

Со крстосницата на улица „Димитар Илиевски Мурато“

Со крстосницата на улица „Солунска“

Проектот, по барање на Општина Битола, го изготви Јавното претпријатие за урбанистичко планирање, проектирање и инженеринг од Битола.

Побезбедно и кај Камениот мост

Освен кај плоштадот, градежни активности се одвиваат и кај Камениот мост. Таму исто така се поставуваат пешачки семафори, мерка која се смета за клучна пред почетокот на летото, кога фреквенцијата на луѓе и возила на оваа локација драстично се зголемува.

Крај за паркингот: Плоштадот „Гоце Делчев“ се враќа на пешаците

Најголемата трансформација ја очекува самиот плоштад „Гоце Делчев“. Според проектната документација, просторот кој досега масовно се користеше како паркинг, целосно ќе се трансформира во пешачка зона и на него повеќе нема да биде дозволено паркирање возила.

Како точно ќе изгледа и со какви содржини ќе се разубави овој простор, денес ќе одлучуваат самите битолчани. Преку отворен граѓански форум, граѓаните ќе имаат можност да ги изнесат своите мислења, идеи и согледувања за финалното уредување на новиот пешачки плоштад.