Битолската „малска банда“ во мисија: Љубов и грижа за оставените кученца кај Аурум

Секој кој поминува по Партизанска, нека застане, нека ги израдува децата и нека донира малку храна за кученцата

Во времиња кога често се дебатира за проблемот со бездомните животни, неколку преслатки дечиња од Битола решија да не чекаат институционални решенија, туку самите да станат промената што сакаат да ја видат во својот град. Оваа прекрасна „малска банда“, како што милуваат да ги наречат од Прифатилиштето за кучиња „Хачико“, деновиве се вистински ангели чувари за три неродени, оставени кученца во близина на „Аурум“ на улица Партизанска.

Наместо да поминат покрај нив со рамнодушност, овие млади хуманитарци ја презедоа целата грижа за малите лепотани. Со својата искрена детска љубов, секојдневна грижа и емпатија, тие прават нешто бесценето – го олеснуваат процесот на социјализација на кученцата и им ги кратат деновите поминати во страв и осаменост.

Од прифатилиштето „Хачико“ со гордост и благодарност истакнуваат дека со вакви млади соработници, приказната за уличните кучиња добива една сосема поинаква, поубава димензија во заедницата. Овие деца се жив доказ дека добрината, грижата и хуманоста немаат возраст и дека најголемите лекции по човечност често доаѓаат од најмладите.

Иако процесот на вдомување е тежок и бавен, децата не се откажуваат. Затоа, активистите упатуваат отворен повик до сите битолчани: секој кој поминува по Партизанска, нека застане, нека ги израдува децата и нека донира малку храна за кученцата.

„Драги битолчани, да земеме пример од овие деца. Со малку внимание, љубов и разбирање можеме заедно да создадеме подобар живот за уличните кучиња и похумана средина за сите. Заедно можеме повеќе“, порачуваат од „Хачико“.

Оваа топла битолска приказна е потсетник дека соживотот и хуманоста почнуваат пред нашиот праг. Поддршката за оваа „малска банда“ е поддршка за посветла иднина на Битола.

Фотографии: Фотографиите се пратени до Хачико од родители и објавени на Фејсбук со нивна дозвола