„Чкембе Фест – Битола 2026“ носи богата програма: Научна трибина, уметничка изложба и дводневна музичка забава на Плоштад Магнолија

Првото издание на фестивалот „Чкембе Фест – Битола 2026“ покрај традиционалните гастрономски специјалитети, на битолчани и сите посетители ќе им понуди богата стручна, културно-уметничка, музичка и хумористична програма исполнета со настапи на бројни фолклорни ансамбли, естрадни уметници и стендап комедија.

1. Прва меѓународна стручно-научна трибина за гастрономски туризам

Во петок, на 9 октомври 2026 година, со почеток во 12:00 часот во Кино „Манаки“ на Широк Сокак, ќе се одржи Првата меѓународна стручно-научна трибина на тема: „Балканска кујна – традицијата и актуелните тенденции во туризмот и угостителството“.

На трибината со свои излагања ќе настапат универзитетските професори:

Проф. д-р Науме Мариноски

Проф. д-р Сашо Коруновски

Проф. д-р Климент Наумов

Професорите ќе го анализираат влијанието на традиционалната кујна низ три клучни димензии – туризмот, културното наследство и економските ефекти врз локалниот развој. По излагањата е предвидена и отворена панел-дискусија за сите присутни угостители, туристички работници, студенти и експерти.

2. Музичка и забавна програма во ПЕТОК (9 октомври) – Плоштад „Магнолија“

Во петок (9 октомври), со почеток од 18:00 часот, на Плоштадот „Магнолија“ започнува првата музичка вечер.

На сцената ќе настапат:

Музички состави и изведувачи: „Анета Бенд“, група „Оскар“, Татјана Стефановска, Дона Петрова, Сара Петровска, Јорде Босилковски, Ема Јовановска, Ташко Каранфиловски, Јове Николовски, Кице Стефановски, Марко Трпчевски, Деан Ѓорѓиовски и Ирена Димовска-Митревска.

Фолклорни и уметнички ансамбли: Фолклорниот ансамбл „БИТОЛА“, како и Играорната група и Хорот при Државното музичко училиште – Битола.

3. Културно-уметничка и забавна програма во САБОТА (10 октомври)

Саботниот ден носи содржини на повеќе локации во градот:

Магаза (11:00 часот): Паралелен уметнички настан – спој од поетско читање на тема посветена на Битола и изложба на слики и фотографии.

Плоштад „Магнолија“ (од 10:30 часот)-Голема дневна забавна и фолклорна програма во која ќе учествуваат:

КУД „Илинден“ – Битола

КУД „Етно Илинден“ – Битола

Играорна група „Весели пензионери“

ЗП „Демир Хисар“

Вокална група „Сирма Војвода“

КУД „Преродба 24“ – Прилеп

Владе и Тајфата

Стендап комедија со Александар Георгиев

„Традицијата не треба само да се зачува – таа треба да се претвори во вредност и визија за иднината. Битола ќе пее, ќе се смее и ќе се забавува на Чкембе Фест 2026“, порачуваат организаторите.