Нова хумана донација за прилепската болница: Компанијата „WIK“ донираше 25 детски креветчиња за ЈЗУ „Борка Талески“

ЈЗУ Општа болница со проширена дејност „Борка Талески“ во Прилеп доби значајна донација од 25 нови детски креветчиња, наменети за подобрување на условите за престој и лекување на најмалите пациенти на детското одделение.

Донацијата е обезбедена од општествено одговорната компанија „WIK“, која по вторпат излегува во пресрет на потребите на прилепската здравствена установа. Изминатата година, истата компанија за потребите на болницата донираше и апарат за видео ЕЕГ, со што уште еднаш ја потврдува својата континуирана грижа за детското здравје и подобрувањето на условите во локалното здравство.

Од раководството на болницата изразија длабока благодарност за оваа хумана гест-иницијатива.

„Од срце благодариме на компанијата WIK за донацијата на 25 детски креветчиња за нашите најмали пациенти. Минатата година ни донираа апарат за видео ЕЕГ, а и оваа година повторно ја покажуваат својата хуманост и грижа за децата. Ви благодариме што сте со нас и што со вашата поддршка создавате подобри услови за лекување и престој на најмалите. Заедно правиме големи дела за малите херои“, истакнаа од ЈЗУ Општа болница „Борка Талески“ – Прилеп.

Со оваа опрема значајно ќе се олесни престојот на децата и нивните родители за време на болничкото лекување, со што се обезбедуваат посовремени и попријатни услови во установата.