Еко активности на битолско Тумбе кафе - проектот Еко аларм ги анимираше младите еко лидери во Пелагонија

Во рамките на проектот „Еко аларм“, успешно се спроведоа еколошки акции за чистење на две локации во познатото битолско излетничко место Тумбе кафе. Во акциите масовно се вклучија младите ентузијасти и средношколците од училиштето „Таки Даскало“ од Битола, кои уште еднаш ја покажаа својата граѓанска одговорност и грижа за природата.

Оваа теренска акција е директен резултат на претходно спроведените едукативни активности. Во првата фаза од проектот, младите поминаа низ специјални обуки на кои теоретски и практично учеа како се мапираат диви депонии и еколошки жаришта со помош на дигитални алатки.

По успешната детекција на критичните точки, средношколците ги засукаа ракавите и излегоа на терен. Од двете локации на Тумбе кафе беа собрани значителни количини отпад, со што на ова омилено место за рекреација на битолчани му се врати уредниот изглед.

Главната цел на овие акции, покрај конкретното расчистување на ѓубрето, е подигнување на јавната свест кај сите граѓани за важноста од зачувување на чистата животна околина.

„Оваа акција покажа дека обуките не останаа само на хартија. Младите научија како да ги лоцираат проблемите во заедницата, но и како да бидат дел од нивното решение. Чистата околина е обврска на секој од нас, а средношколците од Таки Даскало се вистински пример за тоа како се сака својот град“, изјавија организаторите.

Организаторите упатуваат апел до сите посетители на излетничките места да го одлагаат отпадот совесно и да ја чуваат зелената слика на Битола.

Проектот „Eco Alarm“, преку кој се реализираа овие активности, продолжува да ги мотивира младите од Пелагонискиот регион да бидат гласни и активни во заштитата на природата. Истиот е поддржан од Фондот за зајакнување на младите (Youth Empowerment Fund), Глобалната мобилизација на млади (Global Youth Mobilization - GYM) и Европската Унија.