Има ли Битола „кафулиња со мисија“? АРНО бара локали кои ќе ја стават Македонија на европската мапа!

Кафулињата во Битола отсекогаш биле повеќе од обични места за пиење кафе, тие се простор за муабет, за дебати, култура и креирање приказни. Но, дали знаете некој локал кај нас што има специфична општествена, културна или граѓанска мисија и функционира како „Purpose Café“?

Здружението за социјални иновации АРНО, во соработка со европската платформа Europa Cafes, започна мисија за мапирање на токму вакви места низ Македонија – простори каде што живеат културата и дијалогот, каде што профитот често се реинвестира во заедницата и каде луѓето се вмрежуваат за повисоки цели.

Кафулиња кои го менуваат општеството

За да се разбере концептот, доволно е да се погледнат неколку европски примери:

Виена го има Vollpension – место за сите генерации, каде колачите ги подготвуваат и послужуваат пензионери со цел нивна социјализација.

Будимпешта се гордее со Never Give Up – кафуле кое вработува лица со попреченост.

Тирана го има Destil Creative Hub – културен центар за перформанси, дебати и читачки клубови.

Прашањето е: Што има Македонија, а што има Битола и регионот да понудат на оваа мапа?

„Целта е овие места да станат повидливи, подобро поврзани и препознаени како суштински општествени, културни и демократски инфраструктури во Европа. Сакаме да ја ставиме нашата земја на мапата!“, велат од АРНО.

Кој е веќе на листата, а кој недостига?

Граѓаните веќе почнаа да споделуваат предлози низ земјава, па на почетната листа се најдоа места како: Kult Kulturen Centar, Илика, Кафе-книжарница „Долапче“, Дуќан, Shilla – coffee & bar, Tarantino Pub, Комбо Комбо, Srekja Bar Food, Dnevna Event, Oud Coffee Co., Public Room, Shuma Concept Cafe, Metanoja Cafe Gallery, Pogon Bar, Kombo Creative Studio и Kafe Breza…

Но, листата не е конечна! Битолската чаршија и широк сокак сигурно кријат уште катчиња кои заслужуваат европско признание и видливост.

Како да пријавите локал?

Ако знаете кафуле, бар или алтернативен простор во Битола или околината што одговара на овој опис, пријавете го!

Каде да пишете: На социјалните мрежи на АРНО или директно на нивниот мејл: arno.mkd@gmail.com

Краен рок: најдоцна до 19 јули 2026 година.

Да помогнеме нашите автентични локални простори да станат дел од европската мрежа на кафулиња со мисија!