Инфо-сесија во Битола – Од идеја до NFT: Младите создаваат кампањи за општествени промени

Организацијата „ПОРАКА НОВА“ организира интерактивната инфо-сесија со наслов „Од идеја до NFT: Младите создаваат кампањи за општествени промени“.

Настанот ќе се одржи на 26 октомври во Студентскиот Информативен Центар при УКЛО во Битола, во период од 12:00 до 14:00 часот.

Оваа сесија има за цел да ги запознае учесниците со иновативната платформа Social Impact NFTs и да покаже како современите технологии – како вештачката интелигенција (AI), блокчејн (blockchain), NFT и дигиталниот маркетинг – можат да се искористат како моќна алатка за промоција на општествени каузи, поголема видливост на граѓанските организации и поттикнување на младинската креативност.

Инфо-сесијата е организирана во рамките на проектот SINFT поддржан од Европската Унија. За учество не е потребно претходно техничко знаење – добредојдени се сите младински ентузијасти кои сакаат да научат нешто ново, велат организаторите.

Во рамките на инфо сесијата ќе има и практична работилница во која групите ќе развиваат концепти за кампањи, ќе генерираат дигитални слики преку вештачка интелигенција и ќе подготвуваат приказни за своите NFT креации.

Како продолжение на овие активности, од „ПОРАКА НОВА“ дополнително го најавуваат и интернационалниот онлајн вебинар, кој ќе се одржи на 4 ноември 2026 година во 17:00 часот. Вебинарот се организира по повод официјалното лансирање на глобалната платформа за дигитални кампањи за општествено добро – sinft.net.

Активностите се наменети за оние кои сакаат да откријат како дигиталните технологии можат да станат носители на позитивни промени во заедницата.