Креативноста може да го намали стресот кај студентите - работилница за ментално здравје на УКЛО Колорс

Психолошкото советувалиште на УКЛО КОЛОРС одржа работилница посветена на унапредување на менталното здравје кај студентите преку арт терапија – метод кој сè повеќе се применува во светот, а своја примена наоѓа и кај нас.

Од Советувалиштето посочија дека целта е студентите поблиску да се запознаат со арт терапијата, но и да се потсетат дека тоа им стои на располагање за индивидуална и групна поддршка. Активностите ги реализираат проф. д-р Драгана Батиќ од Факултетот за безбедност во Скопје и проф. д-р Гордана Ристевска – Димитровска, од Високата медицинска школа - Битола.

Работилницата ја водеше Цветанка Штерјова-Бурзевска, лиценциран психолог, гешталт психотерапевт, арт терапевт и тренер по арт терапија.

Студенти од повеќе единици на УКЛО имаа можност преку цртеж и креативен процес да се запознаат со начинот на кој сликите и симболите можат да помогнат во полесно изразување на емоциите, намалување на анксиозноста и воспоставување емоционална рамнотежа. Фокусот на работилницата беше ставен на личното доживување и процесот, а не на естетиката на цртежот. Според Штерјова-Бурзевска, преку едноставни техники на цртање студентите воспоставуваат подобар контакт со себе, а ваквиот пристап помага во ослободување од стресот и напнатоста за време на учењето и полагањето испити.

По работилницата што се одржа на 18 мај 2026 година, студентите ги споделија своите впечатоци и добија практични насоки коишто можат да ги применуваат во секојдневниот живот.